სამორინე "შანგრილა" იხურება.
"პირWელის" ინფორმაციით, კაზინო მიმდინარე წლის ნოემბრის ბოლოდან იკეტება, თუმცა მიზეზები უცნობია.
სააგენტო ინფორმაციის გადამოწმების მიზნით, კაზინოს მენეჯმენტს დაუკავშირდა, თუმცა მათ აღნიშნული უარყვეს.
როგორც "პირWელთან" საუბრისას ქართული კაზინოების ჯგუფის დირექტორმა გოჩა მურუსიძემ განაცხადა, "შანგრილა" ჯერჯერობით, ჩვეულებრივ მუშაობს.
"სამორინე ჩვეულებრივ მუშაობს. ჩვენთან 370 ადამიანია დასაქმებული და ხელფასებსაც ჩვეულებრივ გავცემთ. "შანგრილა" 2011 წელს გაიხსნა და კანონის თანახმად, როგორც ყველა სამორინეს, ჩვენც 5-წლიანი ლიცენზია გვაქვს, ამიტომ წესით, ლიცენზიის ვადის ამოწურვამდე არანაირი პრობლემა არ უნდა შეგვექმნას. არა მგონია, ახალი ხელისუფლების ინტერესში შედიოდეს ასობით ადამიანის უმუშევრად დატოვება", - აღნიშნა მურუსიძემ.
ამასთან, რაც შეეხება იმას, რომ სხვადასხვა არასამთავრობო და რელიგიური ორგანიზაციები "შანგრილას" დემონტაჟს მოითხოვენ, ვინაიდან ის საპატრიარქოს გვერდით მდებაროებს, მურუსიძემ განაცხადა, რომ როცა კაზინოს მშენებლობაზე მოლაპარაკებები მიდიოდა, მაშინ ეს ფაქტორი პრობლემა არ ყოფილა.
შეგახსენებთ, რომ საზოგადოების გარკვეული ჯგუფები კაზინოების და სხვა სათამაშო ბიზნესების აკრძალვას მოითხოვენ.
ამასთან დაკავშირებით, საქართველოს პარლამენტის თავმჯდომარემ დავით უსუფაშვილმა განაცხადა, რომ "ქართული ოცნება" კაზინოების დახურვას არ აპირებს, მაგრამ ეს ბიზნესი მოსაწესრიგებელი და დასარეგულირებელია".
"მინდა, ყველა დავამშვიდო, "ქართულ ოცნებას" კაზინოებთან დაკავშირებით რაიმე განსაკუთრებული მიდგომა არ აქვს, რომ ეს უნდა აიკრძალოს, მაგრამ ეს ბიზნესი მოსაწესრიგებელია და ქვეყნის ეკონომიკა მხოლოდ სათამაშო ბიზნესით არ უნდა იყოს აყვავებული. ამას ვამბობდით და ვიმეორებთ, მაგრამ ის, რომ ჩვენ მოვდივართ და რაღაცეებს ვანგრევთ, ვხურავთ და ვკრძალავთ, ეს ასე არ არის", - განაცხადა უსუფაშვილმა იმ გავრცელებული ინფორმაციის საპასუხოდ, რომლის თანახმადაც, "ქართული ოცნება" კაზინოების დახურვას გეგმავს.
