შინაგან საქმეთა სამინისტროში საკადრო ცვლილებების შემდეგ სტუქტურული ცვლილებები იწყება.
ძალოვან უწყებაში ამ პროცესის დაწყებას შინაგან საქმეთა სამინისტროს დებულებაში გახორციელებული ცვლილებები ადასტურებს, რომელსაც პრეზიდენტმა ხელი უკვე მოაწერა და შესაბამისი ბრძანებულება "საკანონმდებლო მაცნეშიც" გამოქვეყნდა. ცვლილება სამინისტროს სისტემაში შემავალ რამდენიმე ქვედანაყოფს შეეხო.
კერძოდ, პრეზიდენტის ბრძანებულებით, სპეციალური ღონისძიებების დეპარტამენტი - ოპერატიული მართვის, კოორდინაციისა და ანალიზის დეპარტამენტად ყალიბდება, საერთაშორისო ურთიერთობების სამმართველოს საერთაშორისო ურთიერთობების დეპარტამენტი ცვლის.
ამასთან, იქმნება ახალი – პოლიტიკისა და დაგეგმვის დეპარტამენტი.
საინტერესოა, მიხეილ სააკაშვილის ბრძანებულების ის ნაწილი, რომელიც სახეცვლილი სტუქტურული ქვედანაყოფების ძირითად ამოცანებსა და კომპეტენციას შეეხება. კერძოდ, შინაგან საქმეთა სამინისტროს მოქმედი დებულებით (21-ე პუნქტის "კ1" ქვეპუნტი) სპეციალური ღონიძიებების დეპარტამენტის ამოცანებია: სახელმწიფო უსაფრთხოებისა და სუვერენიტეტის, ტერიტორიული მთლიანობის დაცვა და ამ მიზნით შესაბამისი ღონისძიებების განხორციელება. სახელმწიფო ინტერსების წინააღმდეგ მიმართული მოქმედებების გამოვლენა, აღკვეთა, შესაბამისი ინფორმაციის მოპოვება, ანალიზი და რეაგირება; თავის კომპეტენციას მიკუთვნებულ საქმეებზე სისხლის სამართლის საპროცესო კოდექსით დადგენილი წესით და ამ კოდექსით გათვალისწინებულ ფარგლებში წინასწარი გამოძიება და სისხლის სამართლებრივი დევნა. სპეციალური ღონისძიებების დეპარტამენტის ბაზაზე შემნილ ოპერატიული მართვის, კოორდინაციისა და ანალიზის დეპარტამენტის ამოცანებად კი ~სამინისტროს ტერიტორიული ორგანოებისა და სხვა ოპერატიული დანაყოფების კომპეტენციაში შემავალი ამოცანების შესრულების კონტროლი, მათი საქმიანობის კოორდინაცია და ანალიზი, სამინისტროს ხელმძღვანელობისთვის შესაბამისი რეკომენდაციების მომზადება, დეპარტამენტის წინაშე მდგარი ამოცანების გადაწყვეტის მიზნით ოპერატიულ-სამძებრო და სპეციალური ღონისძიებების განხორციელება და კომპეტენციის ფარგლებში სისხლის სამართლის საქმეთა გამოძიება, კანონმდებლობით გათვალისწინებული სხვა ამოცანების შესრულება" სახელდება.
საერთაშორისო ურთიერთობების დეპარტამენტი დონორ სახელმწიფოებსა და ორგანიზაციებთან, საზღვარგარეთის ქვეყნების შესაბამის უწყებებსა და საერთაშორისო ორგანიზაციებთან ურთიერთობის დამყარებას, სამინისტროს კომპეტენციას მიკუთვნებულ საკითხებზე საერთაშორისო ხელშეკრულებებისა და შეთანხმებების მომზადებას, სამინისტროს ქვედანაყოფების საქმიანობის ხელშეწყობას საერთაშორისო ურთიერთობების განვითარების, დონორ სახელმწიფოებსა და ორგანიზაციებთან კოორდინაციის, პროექტების მართვის კუთხით და ევროატლანტიკურ სტრუქტურებში ინტეგრაციის ხელშეწყობას უზრუნველყოფს.
რაც შეეხება პოლიტიკისა და დაგეგმვის დეპარტამენტს, პრეზიდენტის ბრძანებულების თანახმად, ის განსაზღვრავს მოკლე, საშუალო და გრძელვადიან მოთხოვნებს სამინისტროს მიერ დასახული მიზნებისა და ამოცანების განსახორციელებლად, შეიმუშავებს თანმიმდევრულ გეგმებს განსაზღვრული მოთხოვნების უზრუნველსაყოფად; ასევე შეიმუშავებს რეფორმების მოკლე, საშუალო და გრძელვადიან გეგმებს; ხელს უწყობს სამინისტროში არსებული სტრატეგიული განვითარების პროგრამების განხორციელებას.
აღნიშნულ ცვლილებებთან დაკავშირებით განმარტებებისთვის "პირWელმა" თავდაპირველად შინაგან საქმეთა მინისტრის მოადგილესთან შოთა ხიზანიშვილთან დაკავშირება სცადა, თუმცა მან სატელეფონო ზარებს არ უპასუხა. ცვლილებების თაობაზე ინფორმირებული აღმოჩნდა პარლამენტის წევრი ნიკა ლალიაშვილი, რომელიც აცხადებს, რომ უწყებაში ბაჩო ახალაიას მისვლის შემდეგ ანალიტიკური ხაზი ძლიერდება. ლალიაშვილი თქმით, ამ მიმართულებით თავდაცვის სამინისტროში ნოდარ ხარშილაძის ხელმძღვანელობით ძლიერი გუნდი მუშაობდა, რომელთაც თავდაცვის სისტემისათვის მნიშვნელოვანი საქმე გააკეთეს და ახლა ეს ბირთვი საქმიანობას შინაგან საქმეთა სამინისტროში განაგრძობს.
ნათია ინაური
