ქალაქ ლაზიკასთან დაკავშირებით მმართველ გუნდს კონსტიტუციაში ცვლილება ისე შეაქვს, რომ წარმოდგენა არ აქვს, კონკრეტულად რა ხარჯებს ითვალისწინებს ახალი ქალაქის მშენებლობა.
დღეს "ნაციონალურ მოძრაობაში" არც ის იციან, რა კონკრეტულ პრინციპებსა და მექანიზმებს დაეფუძნება ის ორგანული კანონი, რომლითაც ლაზიკას სტატუსი და უფლებამოსილებები უნდა განისაზღვროს და რის შესახებაც კონკრეტული ჩანაწერი თავად კონსტიტუციაში იდება.
შესაბამისი კითხვები საპარლამენტო ოპოზიციის წარმომადგენლების მხრიდან პარლამენტის პლენარულ სხდომაზე, საკონსტიტუციო ცვლილებების პროექტის II მოსმენით გახილვისას რამდენჯერმე დაისვა, მაგრამ უშედეგოდ.
მმართველი გუნდის წარმომადგელებმა ოპონენტების საპასუხოდ ბევრი ისაუბრეს იმის შესახებ, რომ ლაზიკა მაღალი თვითმმართველობის მქონე ურბანული ცენტრი იქნება, რომელიც რეგიონის მასშტაბით ფინანსურ-ეკონომიკური და სატრანსპორტო "ჰაბი" გახდება, სადაც მოქნილი სამართლებრივი და ბიზნესგარემო ჩამოყალიბდება და ასე შემდეგ, თუმცა ის, თუ რა კონკრეტული პრინციპები ჩაიდება ამ მიმართულებით ორგანულ კანონში და რა ხარჯებს უკავშირდება ლაზიკას მშენებლობა, ოპოზიციის ამ კითხვებს პასუხი უმრავლესობიდან ვერავინ გასცა.
ამ კონტექსში საინტერესო პარლამენტის თავმჯდომარის დავით ბაქრაძის მიერ დეპუტატ ჯონდი ბაღათურიას მისამართით გაკეთებული განცხადება იყო. ლაზიკასთვის სახელმწიფო ბიუჯეტიდან გასაღები თანხების მოცულობით და ასევე იმ ხარჯებით, რომლის გაწევაც ამ ტერიტორიაზე იუსტიციის სახლის ასაშენებლად ხდება, სწორედ ბაღათურია დაინტერესდა. დეპუტატის კითხვებს ბაქრაძემ "რიტორიკული" უწოდა და მის საპასუხოდ განმარტა, რომ კონსტიტუციაში იწერება არა "დაარსდეს ქალაქი ლაზიკა~, არამედ ლაზიკას სტატუსი და უფლებამოსილებანი განისაზღვროს ორგანული კანონით, რაც ბაქრაძის თქმით, ხარჯებთან დაკავშირებული არ არის.
"პროექტში, რომ ეწეროს, ~დაარსდეს ქალაქი ლაზიკა~, ეს ხარჯებს გამოიწვევდა, მაგრამ ლაზიკას სტატუსი ორგანული კანონით განისაზღვრება, კანონით თუ პრეზიდენტის განკარგულებით, ეს არანაირ ხარჯს არ ქმნის და ვერც შექმნის. თუ თქვენ კონკრეტული ხარჯები და თანხები გაინტერესებთ, გირჩევთ, რიტორიკული კითხვების ნაცვლად, კონკრეტული შეკითხვით კონკრეტულ უწყებას მიმართოთ და ამ შემთხვევაში მე, როგორც პარლამენტის თავმჯდომარე, ნამდვილად მივაქცევ ყურადღებას იმას, რომ ეს კითხვა ადრესატს მიუვიდეს" - მიმართა ბაღათურიას დავით ბაქრაძემ.
ნათია ინაური
