“დემოკრატიული პარტიის” თავმჯდომარის გია თორთლაძის განცხადებით, ევერესტზე ქართული დროშის აფრიალებამ რუსი ჟურნალისტები ძალიან გააღიზიანა.
ამის შესახებ პარტიის თავმჯდომარემ გია თორთლაძემ დღეს გაზეთ “პრაიმ-ტაიმის” პრეს-კლუბში გამართულ პრეს-კონფერენციაზე განაცხადა და რუსული მედიის წარმომადგენლებს გაპიარებისთვის მადლობაც გადაუხადა.
"ევერესტის დალაშქვრას და იქ ქართული დროშის ატანას პოლიტიკური დატვირთვა ჰქონდა. ამით კიდევ ერთხელ ვაუწყე მსოფლიოს, რომ საქართველო ოკუპირებულია. ჩემდა საბედნიეროდ, მიუხედავად იმისა, რომ რუსი ჟურნალისტები, რომლებიც პროფესიულად კარგად არიან მომზადებული და კვალიფიციურებიც არიან, ამ ფაქტით ძალიან გაღიზიანდნენ და იმის პარალელურად, რომ ყველა მედია-საშუალებით ჯერ მომილოცეს, მერე იქვე საყვედურებიი გამოთქვეს იმის თაობაზე, თუ რატომ ავიტანე მწვერვალზე ქართული დროშა. საბოლოო ჯამში, მე ისეთ პიარს ვერ შევძლებდი, რაც რუსმა ჟურანლისტებმა თავიანთი გაღიზიანებით გააკეთეს და ამისთვის მათ მადლობა მინდა, გადავუხადო", - განაცხადა თორთლაძემ და დასძინა, რომ ასეთი ფორმით პროტესტის გამოხატვა და აქტივობა საჭირო და აუცილებელიცაა.
"ვფიქრობ, რომ თუ ჩვენ ჩვენს ქვეყანაში მუდმივად ამ თემებთან დაკავშირებით არ ვისაუბრებთ, ჩვენი დიასპორები არ იაქტიურებენ, ქვეყნის შიგნით არ მოვაწყობთ აქციებს, სხვადასხვა ტიპის ღონისძიებებს, რომელსაც "საქართველო ოკუპანტების გარეშე ერქმევა" დარწმუნებული ვარ, ამას გადამწყვეტი მნიშვნელობა ექნება. ჩვენ ამით მუდმივად შევახსენებთ მსოფლიოს მოქალაქეებს, რომ საქართველო რუსეთის მიერაა ოკუპირებული. ამით დეოკუპაციის პროცესი უფრო დაჩქარდება" - აღნიშნა თორთლაძემ.
