პარლამენტის ოპოზიციონერი წევრ დიმიტრი ლორთქიფანიძის ინფორმაციით, მმართველმა პარტიამ "ზონდერი ქალების" ჯგუფები ჩამოაყალიბა.
დეპუტატის თქმით, "ქალი ზონდერები" ზონდერ-საქმიანობაში ხელფასსაც იღებენ.
ამის თქმის საფუძველს დეპუტატს გუშინ კოდის სამხედრო დასახლებაში – დევნილთა კომპაქტურად ჩასახლების ადგილას მომხდარი ინცინდენტი აძლევს, რა დროსაც "მეცხრე არხის" ჟურნალისტს თამარ გოგესაშვილს ფიზიკურად გაუსწორდნენ.
"თამარ გოგესაშვილი კოდის დევნილთა კომპაქტურად დასახლების ადგილზე იქ არსებული ვითარების შესწავლის და გადაღების მიზნით მივიდა, თუმცა მას ზონდერი ქალები დახვდნენ, დასახლების ადგილას შესვლის შესაძლებლობა არ მისცეს და ფიზიკურადაც გაუსწორდნენ. ეს ქალები არიან – თამარ ტურაშვილი, სონია მენაბდე, მაკა ხადური და მარიკა ტუაევა, რომლებიც ჩემი ინფორმაციით, ინცინდენტის დროს ნასვამ მდგომარეობაში იმყოფებოდნენ. ზონდერ-ქალებს კოორდინაციას უწევს ზედამხედველი ზონდერი, ვინმე ზურაბ რომელაშვილი. როგორც ჩემთვის გახდა ცნობილი, ისინი არარსებულ სამსახურებში გაფორმებული არიან დამლაგებლად, მზარეულად და სინამდვილეში კი, 108-ლარიან ხელფასს ზონდერობაში იღებენ. მათი ზედამხედველის ანაზღაურება კი 1 500 ლარია" - განუცხადა "პირWელს" ლორთქიფანიძემ.
დეპუატის თქმით, კოდაში მომხდარ ინცინდენტს ჰყავს მოწმე დევნილი სვეტა ჩხვიმიანიც, რომელმაც მომხდარი გააპროტესტა და ამის გამო მას ზურაბ რომელაშვილი სახლში შეეჭრა და სიტყვიერი შეურაცხყოფა მიაყენა.
ლორთიქფანიძე აცხადებს, რომ გუშინდელი ინცინდენტით სახეზეა სისხლის სამართლებრივი დანაშაული, რომლითაც პროკურატურა უნდა დაინტერესდეს.
დეპუტატის თქმით, სვეტა ჩხვიმიანს აქვს 40-წამიანი ვიდეო, რომელიც მისმა ქალიშვილმა გადაიღო და მზადაა, ის სამართალდამცველ ორგანოებს გადასცეს.
ნათია ინაური
