ფესტივალი „არტ-გენი 2012“ 3 ივლისს კახეთში, ილიას ტბაზე გაიხსნება.
რეგიონული ტური საქართველოს კიდევ რამდენიმე ქალაქს - ზუგდიდს, წყალტუბოს, ჩოხატაურსა და ფოთს მოიცავს.
21 ივლისიდან 29 ივლისის ჩათვლით „არტ-გენის“ შემაჯამებელი 9-დღიანი დასკვნითი ნაწილი ტრადიციულად თბილისში, ჩიტაიას სახელობის საქართველოს ხუროთმოძღვრებისა და ყოფის სახელმწიფო მუზეუმში გაიმართება. წლევანდელი ფესტივალის თემაა "გაუფრთხილდი ოჯახს", რაც ყველა ღირებული ოჯახური ტრადიციებისა და კულტურული ფასეულობების გაფრთხილებასა და თაობიდან თაობაზე გადაცემას გულისხმობს.
ფესტივალზე წარმოდგენილნი იქნებიან როგორც ხალხური სიმღერის, ინსტრუმენტალური მუსიკის, ქორეოგრაფიის, ზეპირსიტყვიერებისა და რეწვის ოსტატები საქართველოს ყველა კუთხიდან, ასევე საქართველოში მოღვაწე ეროვნული უმცირესობები, სტუმრები კავკასიიდან, ევროპის სხვადასხვა ქვეყნიდან (ლიტვა, საფრანგეთი, პოლონეთი, შოტლანდია, ინგლისი და სხვ.), ასევე აფრიკიდან და მადაგასკარიდან.
ცნობისთვის, ფესტივალი “არტ-გენი” უკვე მეცხრე წელია, ტარდება. მის მიზანს ქართული ფოლკლორის და სხვადასხვა ძირძველი ტრადიციების მოძიება და მათი პოპულარიზაცია წარმოადგენს. პროექტი დაფინანსებულია ევროკავშირის მიერ. ფესტივალის მხარდამჭერები კულტურის და ძეგლთა დაცვის სამინისტრო და თბილისის მერია არიან. ფესტივალის გენერალური სპონსორია ”ბანკი კონსტანტა”, ასევე ღონისძიების სპონსორია აფთიაქების ქსელი „ფარმადეპო“. ფესტივალის პარტნიორები კულტურული მემკვიდრეობის დაცვის სააგენტო, ჩიატაიას სახელობის ეთნოგრაფიული მუზეუმი ღია ცის ქვეშ და საქართველოს ბიზნესის განვითარების ცენტრი ”კავკასია” არიან.
