კოალიცია "არჩევნის თავისუფლებისთვის" ოზურგეთში პრეზიდენტის ვიზიტის დროს ჟურნალისტების საქმიანობაში ხელშეშლის ფაქტს აპროტესტებს.
"ოზურგეთის რაიონის სოფელ ბახვში პრეზიდენტი მიხეილ სააკაშვილი მოსახლეობას შეხვდა. შეხვედრის დაწყებამდე სამართალდამცავებმა პრობლემები შეუქმნეს "გურია ნიუსისა" და "მეცხრე არხის" ჟურნალისტებს. პოლიციელებმა "გურია ნიუსის" ჟურნალისტები ჟანა მეგრელიშვილი, გიორგი გირკელიძე და თამარ ლეფსვერიძე სოფლის ცენტრში, სადაც სააკაშვილი მოსახლეობას უნდა შეხვედროდა, არ შეუშვეს. გადაადგილების პრობლემა შეექმნა "მეცხრე არხის" ჟურნალისტს შორენა ღლონტსაც. მედიის წარმომადგენლებს აპარატურის გარეშეც კი უკრძალავდნენ შეხვედრაზე მისვლას. როგორც პოლიციელები აცხადებდნენ, ჟურნალისტების არშეშვების ბრძანება პრეზიდენტის პრესსამსახურმა გასცა. ჟურნალისტების გადაადგილებას სოფელ ბახვში გურიის სამხარეო პოლიციის უფროსი გურამ ჩანტლაძე აკონტროლებდა. „გურია ნიუსის“ ჟურნალისტებს პრეზიდენტის შეხვედრის გაშუქების შესაძლებლობა მხოლოდ მას შემდეგ მიეცათ, რაც პირადად დაუკავშირდნენ პრეზიდენტის ადმინისტრაციის უფროსის მოადგილეს ირმა ნადირაშვილს, რომელმაც ჟურნალისტები პოლიციის ბლოკ-პოსტებზე გაატარა და შეხვედრის ადგილას მიიყვანა. თუმცა შეხვედრის გაშუქების საშუალება არ მიეცა "მეცხრე არხის" ჟურნალისტს, რომელმაც პოლიციელთა ბარიერები ვერ გაარღვია", - ნათქვამია კოალიციის განცხადებაში.
"არჩვენის თავისუფლებისთვის" პრეზიდენტის ადმინისტრაციისგან სააკაშვილის საჯარო შეხვედრებზე ჟურნალისტების დასწრებისა და უსაფრთხოების უზრუნველყოფას კატეგორიულად მოითხოვს.
"ასევე შინაგან საქმეთა სამინისტროსგან, გამოავლინოს და დასაჯოს ყველა ის პოლიციელი, ვინც ჟურნალისტებს საქმიანობაში უშლის ხელს; მიიღოს ყველა ზომა იმისთვის, რომ მომავალში თავიდან ავიცილოთ მსგავსი ფაქტები; გარდა ამისა, უშიშროების საბჭოს უწყებათაშორისმა კომისიამ უნდა შეისწავლოს ჟურნალისტების საქმიანობის ხელშეშლის ეს ფაქტები და ამჯერად მაინც, მასზე ადეკვატური რეაგირება მოახდინოს", - ნათქვამია კოალიციის განცხადებაში.
