სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმიდესისა და უნეტარესის ილია მეორეს განცხადებით, "ჩვენ უნდა გვქონდეს კავშირი იმ ადამიანებთან, რომელნიც სიკეთის გზაზე დგანან".

დღეს პატრიარქმა წმინდა ილია წინასწარმეტყველის ხსენების დღესთან დაკავშირებით, სამების საკათედრო ტაძარში წმინდა სინოდის წევრებთან ერთად წირვა აღავლინა.

დღესვე მფარველი ანგელოზის დღე უწმინდესს თბილისის მერმა გიგი უგულავამ და რეგიონული განვითარების მინისტრმა რამაზ ნიკოლაიშვილმა მიულოცეს.

"არის ადამიანი, რომელსაც სიკეთის გარეშე არ შეუძლია და არის ადამიანი, რომელსაც არ შეუძლია ბოროტება არ აკეთოს. ჩვენ უნდა გვქონდეს კავშირი იმ ადამიანებთან, რომელნიც სიკეთის გზაზე დგანან. დღეს თქვენს შორის ბრძანდება ასეთი ცნობილი პიროვნება, არის რამაზ ნიკოლაიშვილი. ეს ერთ-ერთი მინისტრია და მე მინდა, მას მადლობა მოვახსენო იმ დიდი საქმეებისთვის, რასაც ის აკეთებს ჩვენი ერისთვის და ეკლესიისთვის", - ბრძანა პატრიარქმა.

პატრიარქმა რამაზ ნიკოლაიშვილი ერისა და ეკლესიის წინაშე განსაკუთრებული ღვაწლისთვის სიგელით დააჯილდოვა.

დავით ჯალაღონია