დღეიდან თბილისის ყველა უბანში მოსახლეობას ახალი, ყვითელი სამარშრუტო ტაქსები მოემსახურება.
როგორც "პირWელს" თბილისის მერიიდან აცნობეს, თბილისში სამარშრუტო ტაქსების შემოყვანისა და ახალი მანქანებით ხაზების დაკომპლექტების პროცესი დასრულდა.
"დღეიდან თბილისელების უსაფრთხო და კომფორტულ გადაადგილებაზე 2 464 ახალი, ყვითელი ფერის სამარშრუტო ტაქსი იზრუნებს. ახალი, 2011 წლის, ფორდის მარკის ყვითელი მანქანები კომფორტულია, კონდიცირების თანამედროვე სისტემითაა აღჭურვილი და თითოეული მგზავრის სრულიად უსაფრთხო გადაადგილებას უზრუნველყოფს. კომპანიამ აღებული ვალდებულება სრულად შეასრულა და მანქანების ჩამოყვანის პარალელურად, საკუთარი სურვილის გათვალისწინებით, სამუშაო ადგილები შეუნარჩუნდა ყველა იმ მძღოლს, რომელიც ადრე ძველ მანქანებზე მუშაობდა. აღნიშნულ სფეროში ამჟამად 4 500-ზე მეტი ადამიანია დასაქმებული. ახალ მიკროავტობუსებში მგზავრების საფასურის გადახდა ტრადიციულთან ერთად თანამედროვე საბარათე სისტემითაც არის შესაძლებელი. მანქანებში დამონტაჟდა შესაბამისი აპარატურა და ნებისმიერ მსურველს შესაძლებლობა აქვს მგზავრობის ღირებულება იგივე ელექტრონული ბარათით გადაიხადოს, რომლითაც მუნიციპალურ ტრანსპორტში: მეტროში, ავტობუსსა და საბაგიროში სარგებლობს", - აცხადებენ მერიაში.
მათივე ინფორმაციით, "სამარშრუტო ტაქსებში სოციალურად დაუცველი მოსახლეობა შეღავათით სარგებლობს".
"ისინი მგზავრობის ღირებულების ნახევარს იხდიან, მეორე ნახევარს სრულად თბილისის მერია ანაზღაურებს. მნიშვნელოვანია, რომ ახალი მიკროავტობუსები სამუშაო დროის დასრულების შემდეგ, კომპანია „თბილისის მიკროავტობუსის“ კუთვნილ ავტოსადგომზე ჩერდება. ყოველდღიურად თითოეული მანქანა ავტოსადგომის სამრეცხაოში ირეცხება, ტექნიკურ დათვალიერებას გადის და მხოლოდ ამის შემდეგ ემსახურება მოსახლეობას. ზაფხულის პერიოში, მოსახლეობისთვის კომფორტის შეთავაზების მიზნით, 1 ივლისიდან სამარშრუტო ტაქსებში სავალდებულო გახდა კონდიცირების სისტემის ჩართვა, რაც კომპანიის მიერ მკაცრად კონტროლდება", - აცხადებენ მერიაში.
ცნობისთვის, თბილისის მერმა გიგი უგულავამ დღეს კომპანია "თბილისი მიკროავტობუსის" ავტოსადგომი დაათვალიერა, სამარშრუტო ტაქსების გამართულობა პირადად შეამოწმა და აღნიშნულ სფეროში დასაქმებულ ადამიანებს გაესაუბრა.
