ფინანსთა მინისტრის დიმიტრი გვინდაძის განცხადებით, სტიქიის შედეგების ლიკვიდიაციის დაფინანსება 2013 წლის სახელმწიფო ბიუჯეტშიც აისახება.

როგორც გვინდაძემ პარლამენტის რიგგარეშე სხდომაზე, საბიუჯეტო ცვლილებების პროექტის განხილვისას განაცხადა, მიმდინარე წლის ბიუჯეტით გათვალისწინებული 162 მილიონი ლარი "ბოლო გაჩერება არ არის".

"ამ დაფინანასებას 2013 წლის ბიუჯეტშიც მოჰყვება მსხვილი ასიგნებები", - აცხადებს მინისტრი.

მისივე განმარტებით, სამინისტროებმა მათი ასიგნებების ხარჯვა სტიქიის პირველივე დღიდან დაიწყეს და 162 მილიონი ამ თანხას ემატება.

სტიქიური მოვლენების შედეგების ლიკვიდაციისთვის და კახეთის რეგიონის აღდგენა-განვითარებისთვის სახელმწიფო ბიუჯეტში დაგეგმილი ცვლილებების განხილვა პარლამენტში მწვავე პოლემიკის ფონზე მიმდინარეობს.

შეგახსენებთ, რომ ამ მიზნით სახელმწიფო ბიუჯეტიდან ჯამში 162.3 მლნ ლარი გამოიყოფა. აქედან 82.3 მლნ ლარი საბიუჯეტო სახსრებით, ხოლო 80 მლნ ლარი დონორი ორგანიზაციების მიერ დაფინანსდება.