საქართველოში აშშ-ის ელჩ ჯონ ბასის განცხადებით, დემოკრატიულ საზოგადოებაში ნებისმიერი სექსუალური ორიენტაციის მქონე ადამიანის უფლებები გარანტირებული უნდა იყოს.
ამის შესახებ ელჩმა მეცნიერებათა აკადემიასთან მომხდარი ინციდენტის კომენტირებისას განაცხადა.
"ამ ინციდენტის დეტალები ჩემთვის უცნობია. შესაბამისად, კომენტარს ვერ გავაკეთებ, მაგრამ ჩვენ მიგვაჩნია, რომ თანამედროვე დემოკრატიულ საზოგადოებაში, რომელიც აღიარებს და მხარს უჭერს ადამიანის უფლებათა საყოველთაო დეკლარაციებს, ნებისმიერი სექსუალური ორიენტაციის მქონე ადამიანის უფლებები გარანტირებული და უზრუნველყოფილი უნდა იყოს, ნებისმიერ ადამიანს უნდა ჰქონდეს შესაძლებლობა, თავისი აზრი და შეხედულება გამოხატოს საზოგადოების სხვა წარმომადგენლებისგან მასზე ზეწოლისა და ძალის გამოყენების შიშის გარეშე. ნებისმიერი დინამიურად განვითარებადი დემოკრატიული საზოგადოებისთვის მნიშვნელოვანია გამოხატვის თავისუფლების უზრუნველყოფა საზოგადოების ყველა წევრისთვის, მათ შორის უმცირესობების წარმომადგენლებისთვის ისე, რომ არ იყოს საშიშროება რწმენის თუ რაიმე სხვა მიზეზით ამ ადამიანის ფუნდამენტური უფლებების შელახვისა", - განაცხადა ჯონ ბასმა.
შეგახსენებთ, რომ დღეს ჰომოფობიასთან ბრძოლის დღესთან დაკავშირებით, ორგანიზაცია "იდენტობის" მიერ ორგანიზებული აქციის მონაწილეების წინააღმდეგ პროტესტი რიგითმა მოქალაქეებმა და ასევე სასულიერო პირებმა გამოხატეს.
ნინო ჩიჩუა
