კონსტიტუციონალისტ ავთანდილ დემეტრაშვილის განცხადებით, ევროკავშირის წევრი სახელმწიფოების მოქალაქეებისთვის არჩევნებში მონაწილეობის უფლების მინიჭების შესახებ საკონსტიტუციო ცვლილებები იძულებითია, თუმცა არსებული პოლიტიკური სიტუაციიდან გამოსავლად შეიძლება ჩაითვალოს.
როგორც დემეტრაშვილმა "პირWელს" განუცხადა, ის კონსტიტუციის ხშირი გადასინჯვისა და ერთ პიროვნებაზე მისი მორგების წინააღმდეგია. შესაბამისად, დემეტრაშვილი მიესალმება, რომ ზემოაღნიშნული ცვლილება არა ქვეყნის მთავარი კანონის ძირითად ტექსტში, არამედ გარდამავალ დებულებებში შედის.
"ეს არის იძულებითი ცვლილება, რომელიც შექმნილ პოლიტიკური სიტუაციას უკავშირდება, როდესაც ძლიერი პოლიტიკური სუბიექტი გამოჩნდა, რომელსაც საქართველოს მოქალაქეობა არ აქვს. ამიტომ, ესაა დროებითი ღონისძიება, რაც ვფიქრობ, მიზანშეწონილია. მე წინააღმდეგი ვიყავი, აღნიშნული ცვლილება კონსტიტუციის ძირითად ტექსტში შესულიყო. როგორც ახლა გაიკვა, ცვლილება გარდამავალ დებულებებში იქნება ასახული", - განაცხადა დემეტრაშვილმა.
მისივე თქმით, ამ ცვლილებიდან გამომდინარე კონსტიტუციის დებულებების, საარჩევნო კოდექსის და რამდენიმე საკანონდებლო აქტის კომპლექსურად გადახედვა უნდა მოხდეს.
"კონსტიტუციის ხშირი გადასინჯვის და მისი ერთ პიროვნებაზე მორგების წინააღმდეგი ვარ, თუმცა ამ შემთხვევაში, ვფიქრობ, ეს უნდა განვიხილოთ, როგორც სიტუაციიდან გამოსავალი", - დასძინა დემეტრაშვილმა.
რაც შეეხება იმას, უმჯობესი ხომ არ იქნებოდა, ბიძინა ივანიშვილის მოქალაქეობის საკითხი პრეზიდენტის ბრძანებულებით გადაწყვეტილიყო, იმის ნაცვლად, რომ ამას საკონსტიტუციო ცვლილებები მოჰყოლოდა, დემეტრაშვილი მიიჩნევს, რომ "თავდაპირველი გადაწყვეტილება ივანიშვილისთვის მოქალაქეობის ჩამორთმევის შესახებ აბსოლუტურად კორექტული იყო, შემდეგ კი ივანიშვილის ადვოკატებმა შეცდომა დაუშვეს, რადგან მათ მოქალაქეობის მინიჭების თაობაზე ორივე გზისთვის უნდა მიემართათ".
შეგახსენებთ, რომ საქართველოს პარლამენტმა საკონსტიტუციო ცვლილება, რომელიც ევროკავშირის წევრი სახელმწიფოების მოქალაქეებს საარჩევნო უფლებამოსილებებს ანიჭებს, I მოსმენით მიიღო.
საკონსტიტუციო პროექტს 112 დეპუტატმა ერთხმად დაუჭირა მხარი.
I მოსმენით მიღებული პროექტის თანახმად, კონსტიტუციის გარდამავალ დებულებებს ასეთი შინაარსის ახალი 104/4 მუხლი ემატება: "2014 წლის 1 იანვრამდე საპარლამენტო და საპრეზიდენტო არჩევნებში მონაწილეობის და ხმის მიცემის უფლება საქართველოს მოქალაქეებთან ერთად შესაბამისი ასაკიდან ასევე აქვთ პირებს, რომლებიც დაბადებული არიან და ბოლო 10 წელი მუდმივად ცხოვრობენ საქართველოში და ევროკავშირის წევრი სახელმწიფოს მოქალაქეობა აქვთ".
ნინო ჩიჩუა
