კოალიცია "ქართული ოცნების" ლიდერის ბიძინა ივანიშვილის ადვოკატებმა თბილისის საქალაქო სასამართლოში სამოქალაქო რეესტრის სააგენტოსა და საქართველოს პრეზიდენტის წინააღმდეგ სარჩელი შეიტანეს.
ამის შესახებ ივანიშვილის იურიდიული ჯგუფის ადვოკატებმა ალექსანდრე ბარამიძემ და შალვა თადუმაძემ დღეს სასტუმრო "თბილისი მარიოტში" გამართულ პრესკონფერენციაზე განაცხადეს.
"სამოქალაქო რეესტრის დასკვნა "საქართველოს მოქალაქეობის" შესახებ საქართველოს ორგანული კანონის დებულებას აშკარად ეწინააღმდეგება, რომლის თანახმად, საქართველოს პრეზიდენტი უფლებამოსილია, უცხოელ მოქალაქეთა და მოქალაქეობის არმქონე პირთა საქართველოს მოქალაქედ მიღების თაობაზე გადაწყვეტილება მიიღოს. იგი ასევე კანონმდებლობით დადგენილ სხვა ნორმებსაც ეწინააღმდეგება", - განაცხადა ალექსანდრე ბარამიძემ.
შალვა თადუმაძის თქმით, საქართველოს პრეზიდენტმა მიხეილ სააკაშვილმა "თავისი უმოქმედობით "საქართველოს მოქალაქეობის" შესახებ საქართველოს ორგანული კანონის მოთხოვნა უხეშად დაარღვია.
"ამ კანონის თანახმად პრეზიდენტი იღებს გადაწყვეტილებას პირის საქართველოს მოქალაქედ მიღების თაობაზე. დადებითი გადაწყვეტილების მიღების შემთხვევაში იგი გამოსცემს ბრძანებულებას, უარყოფითი გადაწყვეტილების შემთხვევაში კი - განკარგულებას", - აღნიშნა მან.
საქალაქო სასამართლოში ადვოკატებმა სარჩელი 2 მაისს შეიტანეს.
მათი თქმით, სასამართლომ გადაწყვეტილება დაახლოებით 2 თვეში უნდა გამოიტანოს.
დათო ჯალაღონია
