"ქართუ ჯგუფის" ხელმძღვანელობა ხელისუფლებას საჯარო აუქციონის შეჩერებისკენ მოუწოდებს.
"ქართუ ჯგუფის" ხელმძღვანელობა უფლებამოსილია განაცხადოს, რომ გუშინ საღამოს, 18:00 სთ-ზე აღსრულების ეროვნულმა ბიურომ ბიძინა ივანიშვილისთვის დაკისრებული ჯარიმის უზრუნველსაყოფად საჯარო აუქციონზე გაიტანა "ქართუ ჯგუფის" აქციათა 100%, მათ შორის ბანკ "ქართუს" აქციათა სრული პაკეტი, მიუხედავად იმისა, რომ არცერთ ამ სააქციო საზოგადოებაში ბიძინა ივანიშვილი არ ფლობს არცერთ ცალ აქციას. მეორეს მხრივ, ბიძინა ივანიშვილმა გააკეთა საჯარო განცხადება, რომელშიც აღნიშნა, რომ იგი საქართველოში არანაირ ბიზნესს არ ფლობს. ეს დასტურდება "ქართუ ჯგუფის" აქციების ახალი მფლობელების მიერ გამოგზავნილი ყიდვა-გაყიდვის ხელშეკრულებით, რომელთა თანახმადაც ჯერ კიდევ ამა წლის 30 აპრილს 11-მა უცხოურმა კომპანიამ შეიძინა ჯგუფის აქციათა 91,74%, ამასთან არცერთი მათგანი არ ფლობს აქციათა 10% სა და მეტს, რაც ათავისუფლებთ მათ, როგორც "ბანკ ქართუს" ბენეფიციარ მფლობელებს საქართველოს ეროვნულ ბანკთან შეძენის ფაქტის წინასწარი შეთანხმების საკანონმდებლო ვალდებულებებისგან და აბსოლუტურად უსაფუძვლოს ხდის ქვეყნის ცენტრალური ბანკის განცხადებას გარიგებათა ბათილობის შესახებ. სამწუხაროდ, დღემდე ჩვენამდე ვერ მოაღწია უცხოეთიდან ფოსტით უკვე ორჯერ გამოგზავნილმა სადამფუძნებლო დოკუმენტაციამ, რაც სერიოზულ ეჭვებს ბადებს, რომ ჩვენთვის ასე აუცილებელი კორესპონდენცია სპეციალურად იბლოკება. ხაზგასასმელია ის გარემოებაც, რომ გახსნილი საჯარო აუქციონი აშკარა ფარსია, რადგანაც 1 ლოტად იყიდება "ქართუ ჯგუფის" აქციათა 100% და მათ შორის ბანკი "ქართუს" აქციათა მთლიანი პაკეტი, რომლის შემძენსაც აუცილებლად წინასწარ უნდა ჰქონდეს საქართველოს ეროვნული ბანკის თანხმობა, რაც ფარული აუქციონის შემთხვევაში მიუღწეველია. შედეგად აუქციონზე "ქართუ ჯგუფის" აქციათა პაკეტის შემძენი რომც გამოჩნდეს, დარიგება აპრიორი ბათილი იქნება და ქონება სახელმწიფო საკუთრებაში გადავა. სწორედ ეს არის ხელისუფების მიზანი და არა თუნდაც უკანონოდ დაკისრებული ჯარიმის თანხის ამოღება. ვერავითარ კრიტიკას ვერ უძლებს ქონების შეფასების გამოყენებული პრაქტიკაც. მხოლოდ ბანკ "ქართუს" აქციის ღირებულების შეფასებას მსოფლიოს წამყვანი აუდიტორული ფირმები მინიმუმ 1 თვეს მოანდომებდნენ. ლევან სამხარაულის სახელობის ექსპერტიზის ბიურომ კი ლამის 2 დღეში შეაფასა. არსებული შეფასება ბადებს საფუძვლიან ეჭვს, რომ ბიძინა ივანიშვილზე დაკისრებული ჯარიმის თანხა უბრალოდ გაორმაგებულია, რათა შემდგომ აუქციონის წესებით შეემცირებინათ ჯარიმის თანხის ოდენობამდე", - განაცხადა "ქართუ ბანკის" პრეზიდენტმა ნოდარ ჯავახიშვილმა.
ამასთან, "ქართუ ჯგუფის" ხელმძღვანელობა საქართველოს ხელისუფლებას მოუწოდებს, საქართველო საკანონმდებლო ჩარჩოებს დაუბრუნდეს და უცხოეთის მოქალაქეების კუთვნილი ქონებების ექსპროპრიაციის უკანონო პროცესი შეაჩეროს, შეაჩეროს საჯარო აუქციონი და დამფუძნებლებს საშუალება მისცეს, ქონების ფლობისა და განკარგვის ლეგიტიმური უფლება განახორციელონ.
ამასთან, ნოდარ ჯავახიშვილს ეჭვი ეპარება, რომ ხელისუფლება ამ მოწოდებას გაითვალისწინებს, თუმცა აცხადებს, რომ საბოლოო ჯამში მათ მოუწევთ სამართლიანობის აღსრულება და "ქართუ ჯგუფი" და "ქართუ ბანკი" ყველაფერს დაიბრუნებენ.
ნინო ჩიჩუა
