კოალიცია “ქართული ოცნების” ლიდერ ბიძინა ივანიშვილის ადვოკატების შეფასებით, “სასამართლოს 6 თვე დასჭირდა იმისთვის, რომ ივანიშვილისთვის საქართველოს მოქალაქეობის მინიჭებაზე ყოველგვარი დასაბუთების გარეშე უარი ეთქვა”.

ამის შესახებ ალექსანდრე ბარამიძემ და ზაქარია ქუცნაშვილმა დღეს სააპელაციო სასამართლოში ივანიშვილის მოქალაქეობასთან დაკავშირებული პროცესის დასრულების შემდეგ განაცხადეს.

“მოსამართლეს არ დაუსაბუთებია თუნდაც 2 სიტყვით, რა მიზეზით არ დააკმაყოფილა ჩვენი სააპელაციო საჩივარი. რასაკვირველია, გასაჩივრებას ვაპირებთ. გვესმის, რომ ამას ფორმალური ხასათი აქვს, რადგან საქართველოში დამოუკიდებელი სასამართლო არ არსებობს, თუმცა ჩვენ ამას მაინც გავაკეთებთ იმისთვის, რომ შემდეგ ეს ყველაფერი უფლებადაცვით საერთაშორისო ინსტანციაში გავასაჩივროთ”, - განაცხადა ბარამიძემ.

ზაქარია ქუცნაშვილის განცხადებით კი, იგი სასამართლოს გადაწყვეტლებას ღიმილით შეხვდა.

“სააპელაციო სასამართლომ ჩვენი ეჭვი დაადასტურა, თუ რის გამო აჭიანურებდა 6 თვის განმავლობაში საჩივრის განხილვას. ისინი წელავენ დროს იმისთვის, რომ ივანიშვილიმა ვერ მიიღოს მოქალაქეობა და საარჩევნო პროცესში საქართველოს მოქალაქის სტატუსით ვერ ჩაერთოს”-განაცხადა ქუცნაშვილმა.

შეგახსენებთ, რომ თბილისის სააპელაციო სასამართლოს გადაწყვეტილებით, კოალიცია ,,ქართული ოცნების” ლიდერს ბიძინა ივანიშვილს საქართველოს მოქალაქეობა არ მიენიჭა.