რუსთავის #6 საპყრობილეში მყოფი პატიმარი გიორგი ოქროპირიძე, რომლის წამების თაობაზეც უფლებათადამცველები და პარლამენტის ოპოზიციონერი წევრები აქტიურად საუბრობენ, მეოთხე დღეა, შიმშილობს. პროკურატურის წინ შიმშილობის დაწყებას გეგმავს პატიმრის დედა ცირა გოდერძიშვილი.
ამის შესახებ “პირWელს” თავად გოდერძიშვილმა აცნობა, რომლის ინფორმაციითაც, მისი ვაჟი ამჟამად კარცერშია გადაყვანილი. მისი თქმით, შიმშილობის დაწყებას მხოლოდ ერთი მოთხოვნა აქვს – მოხდეს პატიმრის რუსთავის საპყრობილიდან საავადმყოფო დაწესებულებაში ან ღია ზონაში გადაყვანა.
"წამების შემდეგ მისი ჯანმრთელობის მდგომარეობა ძალიან დამძიმებულია. აწუხებს ციფროზის II სტადია, ცე-ჰეპატიტი, თიაქარი, კუჭის, თვალის და ფილტვის დაავადებები. მისი გადაყვანა აუცილებლად უნდა მოხდეს საავადმყოფოში ან ღია ზონაში" - განუცხადა “პირWელს” ცირა გოდერძიშვილმა.
გიორგი ოქროპირიძის მდგომარეობით დაინტერესებისა და რეაგირებისკენ რამდენიმე ხნის წინ პარლამენტს დეპუტატმა ნიკა ლალიაშვილმაც მიმართა.
როგორც მაშინ ლალიაშვილმა განმარტა, ოქროპირიძე ერთადერთი ადამიანია, რომელმაც სასამართლო სხდომაზე ციხის ადმინისტრაციის ის წარმომადგენლები ამხილა და კონკრეტული გვარები დაასახელა, ვინც მას აწამებდა. დეპუტატის ინფორმაციით, ოქროპირიძის ტანჯვა დღესაც გრძელდება, რადგან მას საკუთარ მტანჯველთა წინააღმდეგ სტასბურგის სასამართლოში სარჩელი აქვს შეტანილი.
ლალიაშვილმა კოლეგებს აცნობა ისიც, რომ ხსენებული პატიმარი მშრალ შიმშილობას იწყებდა.
