საქართველოს განათლებისა და მეცნიერების მინისტრ დიმიტრი შაშკინთან შეხვედრის მოთხოვნით საქართველოს ტექნიკური უნივერსიტეტის ადმინისტრაციული კორპუსის წინ რამდენიმე სტუდენტმა შიმშილობა დაიწყო.

მოშიმშილეებს შორის ტექნიკური უნივერსიტეტის 4 და თბილისის ივანე ჯავახიშვილის სახელმწიფო უნივერსიტეტის 1 სტუდენტია.

"ჩვენს ქვეყანაში სწავლის გადასახადი კაბალურადაა გაზრდილი, რაც ქვეყნის სოციალურ მდგომარეობას არ შეესაბამება. გარდა ამისა, ათასობით სტუდენტს სტუდენტის სტატუსი სწავლის მაღალი გადასახადის გადაუხდელობის ან ვადაგადაცილების გამო შეჩერებული აქვთ. ამ საკითხებზე დასალაპარაკებლად განათლების მინისტრთან უკვე 2 თვეზე მეტია, შეხვედრას  ვითხოვთ, თუმცა უშედეგოდ. ამიტომ დღეს ჩვენ შიმშილობას ვიწყებთ", - განაცხადა ტექნიკური უნივერსიტეტის მე-2 კურსის სტუდენტმა ლექსო კობაიძემ.

მისი ინფორმაციით, სტუდენტის სტატუსი 10000-მდე ახალგაზრდას აქვს შეჩერებული.

როგორც დღეს გამართულ აქციაზე გახდა ცნობილი, 25 აპრილს თსუ-ის I კორპუსის წინ სხვადასხვა უმაღლესი სასწავლებლების ორგანიზებით ზემოაღნიშნული მოთხოვნებით ასევე საპროტესტო აქცია იგეგმება, რომელსაც დღევანდელი აქციის ორგანიზატორები მსვლელობით შეუერთდებიან.

მოშიმშილეები ამ წუთებში ადმინისტრაციული კორპუსის კიბეებთან იმყოფებიან.